काठमाडौं । आईसीसी विश्वकप क्रिकेट लिग–२ मा नेपालले आज यूएईसँग प्रतिस्पर्धा गर्दैछ । नेपाल र यूएईको खेल आज बिहान सवा ११ बजेदेखि सुरु हुँदैछ ।
लिग–२ अन्तर्गत यूएई सिरिजको पहिलो खेलमा अमेरिकासँग पराजित भएको नेपालका लागि आजको खेल जित्नै पर्ने दबाब छ ।
लिग–२ शृङ्खलामा नेपाल र आयोजक यूएईलाई हराएपछि अमेरिका तालिकाको शीर्षस्थानमा उक्लिएको छ ।
दुबई इन्टरनेसनल क्रिकेट मैदानमा गत मंगलबार भएको खेलमा अमेरिकाले यूएईलाई चार विकेटले हरायो । यसअघि शृङ्खलाको पहिलो खेलमा अमेरिकाले नेपालमाथि १ सय ६ रनको सहज जित निकालेको थियो ।
अमेरिकासँगको पहिलो खेलमा कमजोर ब्याटिङ गरेको नेपाललाई घरेलु टोली यूएईलाई पराजित गर्न आज थप मिहिनेत गर्नुपर्ने अवस्था छ ।
नेपालले यूएईपछि शृङ्खलाको अर्को खेल कात्तिक १५ गते शनिबार अमेरिकासँग र अन्तिम खेल कात्तिक १९ गते बुधबार यूएईसँग खेल्नेछ ।
विश्वकप लिग–२ मा १७ खेल खेलेको नेपालले १२ अंक जोडेको छ । समान खेल खेलेको युएईको ६ अंक छ । तालिकामा नेपाल सातौं स्थानमा छ भने यूएई आठौं स्थानमा छ । २२ खेल खेलिसकेको अमेरिका ३२ अंकसहित तालिकाको शीर्ष स्थानमा छ ।
