प्रकाश खनाल
छत्रदेव ४
अर्घाखाँची
मुक्तक १
व्यथा, बाधा, हैरानी सबै सुनाएँ
बेहोर्नुपरेको नोक्सानी सबै सुनाएँ
कसैले सोध्यो म सफल हुनुको कारण
मैले असफलताका कहानी सबै सुनाएँ
मुक्तक २
देख्दा सत्य लागेका कतिपय कुराहरू कृत्रिम हुन्छन्
निकै कम कुराहरू छन् जुन अपेक्षा गरेबमोजिम हुन्छन्
भ्रम नै भ्रम बीचको वास्तविकता जिन्दगी हो यथार्थमा
‘अत्यावश्यक’ कुराहरू भित्रै जिन्दगीका जोखिम हुन्छन्
मुक्तक ३
आफैले आफ्नै बारे चिन्तन,मनन र अध्ययन गर्नुपर्छ
जीवनको सार प्राप्त गर्न ज्ञानको सागर मन्थन गर्नुपर्छ
‘शरीर’ मात्रै मानव होइन, त्यो मानवको भौतिक रूप हो
मानव बन्न त ‘ज्ञानेन्द्रिय’लाई ‘ज्ञान’ले प्रतिस्थापन गर्नुपर्छ
मुक्तक ४
कहिलेकाहीँ आफै पछाडि पर्नुपर्छ अरूकै निम्ति
जोखिम कदम चाल्न अगाडि सर्नुपर्छ अरूकै निम्ति
शिखरमा पुग्न, नाम राख्न सजिलो छैन जिन्दगीमा
काम गर्नुपर्छ अरूकै निम्ति त्याग गर्नुपर्छ अरूकै निम्ति
