काठमाडौँ । फिफा विश्वकप फुटबल २०२६ को अन्तिम १६ अन्तर्गत सोमबार (नेपाली समयअनुसार मंगलबार बिहान १२ः४५ बजे) हुने पोर्चुगल र स्पेनबीचको बहुप्रतीक्षित भिडन्तले विश्व फुटबल समर्थकको ध्यान तानेको छ। अमेरिकाको एटी एन्ड टी स्टेडियममा हुने यो खेल प्रतियोगिताकै सबैभन्दा रोमाञ्चक नकआउट प्रतिस्पर्धामध्ये एक मानिएको छ।
पोर्चुगलले अन्तिम ३२ मा क्रोएसियालाई २–१ ले हराउँदै अन्तिम १६ मा स्थान सुरक्षित गरेको थियो। निकै तनावपूर्ण बनेको उक्त खेलमा क्रोएसियाको अन्तिम समयमा भएको गोल भिडियो पुनरावलोकन (VAR) र बल सेन्सर प्रविधिबाट अफसाइड ठहरिएपछि पोर्चुगलले राहत पाएको थियो। यससँगै कप्तान क्रिस्टियानो रोनाल्डोको विश्वकप जित्ने सपना अझै जीवित रहँदा क्रोएसियाली कप्तान लुका मोड्रिचको विश्वकप यात्रा भने समाप्त भएको थियो।
क्रोएसियामाथिको जितले पोर्चुगललाई ऐतिहासिक उपलब्धिसमेत दिलाएको छ। सन् १९६६ पछि पहिलोपटक विश्वकपमा पछि परेको अवस्थाबाट पुनरागमन गर्दै जित निकाल्न टोली सफल भएको हो। यद्यपि पछिल्ला केही ठूला प्रतियोगितामा अन्तिम १६ पोर्चुगलका लागि चुनौतीपूर्ण बन्दै आएको इतिहास छ।
उता, युरोपेली च्याम्पियन स्पेनले अस्ट्रियामाथि ३–० को प्रभावशाली जित निकाल्दै आफ्नो उपाधि दाबेदारी थप बलियो बनाएको छ। मिकेल ओयारजाबालले दुई तथा पेड्रो पोरोले एक गोल गर्दै टोलीलाई सहज जित दिलाएका थिए। ओयारजाबाल पछिल्ला १६ अन्तर्राष्ट्रिय खेलमा २३ गोलमा प्रत्यक्ष संलग्न रहँदै उत्कृष्ट लयमा छन्।
स्पेनको सबैभन्दा ठूलो शक्ति भनेको उसको सुदृढ रक्षापंक्ति बनेको छ। प्रतियोगिताभर स्पेनले हालसम्म कुनै गोल नखाई अन्तिम १६ सम्मको यात्रा तय गरेको छ। अस्ट्रियाविरुद्ध विपक्षीलाई एउटा पनि ‘सट अन टार्गेट’ गर्न नदिएको प्रदर्शनले टोलीको रक्षात्मक मजबुती झन् स्पष्ट पारेको थियो।
इतिहासमा स्पेनको पक्ष बलियो देखिन्छ। दुवै टोलीबीच हालसम्म ४१ खेल हुँदा स्पेनले अधिकांश खेलमा सफलता हासिल गरेको छ। तर पछिल्लो भेटमा भने पोर्चुगल विजयी भएको थियो। २०२४–२५ नेसन्स लिगको फाइनलमा पोर्चुगलले पेनाल्टी सुटआउटमार्फत स्पेनलाई हराउँदै उपाधि जितेको थियो।
दुवै टोली उत्कृष्ट लयमा छन्। पोर्चुगल पछिल्ला ६ खेलमा ४ जित र २ बराबरीमा अपराजित छ भने स्पेनले पनि पछिल्ला ६ खेलमा ४ जित र २ बराबरीको नतिजा निकालेको छ। दुवै प्रशिक्षकसँग अधिकांश प्रमुख खेलाडी उपलब्ध रहेकाले बलियो टोली मैदानमा उतार्ने अपेक्षा गरिएको छ।
पोर्चुगलका लागि कप्तान क्रिस्टियानो रोनाल्डो, ब्रुनो फर्नान्डेस, राफाएल लियाओ र भिटिन्हामाथि विशेष जिम्मेवारी रहनेछ। यता स्पेनले रोड्री, पेड्री, लामिन यामाल, डानी ओल्मो र ओयारजाबालमार्फत आक्रमण बुन्ने तयारी गरेको छ।
विश्लेषकहरूका अनुसार खेलको निर्णायक पक्ष मिडफिल्ड हुनेछ। दुवै टोलीले प्रतियोगिताभर ६० प्रतिशतभन्दा बढी बल नियन्त्रण कायम राखेकाले बल नियन्त्रण र मध्यपङ्क्तिको संघर्षले खेलको नतिजा निर्धारण गर्न सक्छ। स्पेनको सशक्त रक्षापंक्तिले पोर्चुगलको आक्रमणलाई रोक्न सक्ने विश्वास गरिए पनि निर्णायक क्षणमा खेलको दिशा बदल्ने क्षमता पोर्चुगलसँग पनि पर्याप्त छ।
यही कारण यो खेललाई स्पष्ट रूपमा कुनै एक टोलीको पक्षमा झुकाउन कठिन मानिएको छ। यद्यपि उत्कृष्ट रक्षात्मक प्रदर्शनका आधारमा स्पेनलाई हल्का अग्रता दिइएको छ भने पोर्चुगल आफ्नो अनुभव र व्यक्तिगत प्रतिभाको बलमा अर्को ठूलो सफलता हासिल गर्ने लक्ष्यसहित मैदान उत्रनेछ।
यसैबीच, मंगलबार बिहान ५ः४५ बजे हुने अर्को अन्तिम १६ को खेलमा सहआयोजक अमेरिका र बेल्जियमबीच प्रतिस्पर्धा हुनेछ।
