सुर्खेत । फागुन २१ गते सम्पन्न प्रतिनिधिसभा निर्वाचनको अन्तिम परिणामले कर्णाली प्रदेशमा पुराना दलहरूको पकड अझै बलियो रहेको देखाएको छ। देशभरि नयाँ शक्तिका रूपमा उदाएको राष्ट्रिय स्वतन्त्र पार्टी (रास्वपा) को प्रभाव कर्णालीमा भने सीमित देखिएको छ।
१२ प्रतिनिधिसभा निर्वाचन क्षेत्र रहेको कर्णालीमा **नेपाली कांग्रेस**ले ५ सिट जित्दै पहिलो शक्ति बनेको छ। नेपाल कम्युनिस्ट पार्टी (नेकपा) ले ४ सिटमा जित हात पारेको छ भने नेपाल कम्युनिस्ट पार्टी (एमाले) ले १ सिटमा मात्र सफलता पाएको छ। त्यसैगरी राष्ट्रिय प्रजातन्त्र पार्टी र रास्वपाले पनि १–१ सिट जितेका छन्।
परिणामले कर्णालीका मतदाताले राजावादीदेखि गणतन्त्रवादी र पुरानादेखि नयाँ दलसम्म सबैलाई प्रतिनिधित्व गर्ने अवसर दिएको देखिएको छ।
कांग्रेसको पुनरागमन
सुर्खेत–१ बाट कांग्रेसका विष्णुबहादुर खड्का विजयी भए। उनले एमालेका **ध्रुवकुमार शाही**लाई पराजित गरे। यो क्षेत्रबाट लामो समयदेखि कांग्रेसका नेता पूर्णबहादुर खड्का निर्वाचित हुँदै आएका थिए।
कांग्रेसले हुम्ला, मुगु, जाजरकोट, सुर्खेत–१ र दैलेख–१ मा जित निकालेको छ। जाजरकोटमा कांग्रेसका **खड्कबहादुर बुढा**ले नेकपाका प्रभावशाली नेता **शक्तिबहादुर बस्नेत**लाई पराजित गर्दै कम्युनिस्ट गढ तोडे।
नेकपाको परम्परागत आधार कायम
रुकुम पश्चिम, कालिकोट, सल्यान र डोल्पामा भने नेकपाले आफ्नो पकड कायम राखेको छ। कालिकोटबाट महेन्द्रबहादुर शाही र डोल्पाबाट धनबहादुर बुढा निर्वाचित भएका छन्। धनबहादुर बुढा लगातार चौथो पटक प्रतिनिधिसभा सदस्य बनेका हुन्।
एमाले, रास्वपा र राप्रपाको एक–एक सिट
दैलेख–२ बाट एमालेका लक्ष्मीप्रसाद पोखरेल विजयी भएका छन्।
सुर्खेत–२ मा रास्वपाका **रमेशकुमार सापकोटा**ले कांग्रेस र एमालेका उम्मेदवारलाई पराजित गर्दै जित निकाले।
जुम्लाबाट राप्रपाका ज्ञानबहादुर शाही (ज्ञानेन्द्र) विजयी भए। उनले लगातार दोस्रो पटक जित हासिल गरेका हुन्।
जनार्दन र ‘प्रकाण्ड’ पराजित
यस निर्वाचनले केही प्रभावशाली नेताहरूको संसदीय यात्रामा पूर्णविरामसमेत लगाएको छ। रुकुम पश्चिमबाट लगातार चुनाव जित्दै आएका जनार्दन शर्मा पराजित भए। त्यस्तै कालिकोटबाट उम्मेदवार बनेका खड्कबहादुर विश्वकर्मा ‘प्रकाण्ड’ पनि पराजित भए।
कर्णालीको यो परिणामले देशभरि देखिएको नयाँ राजनीतिक लहरको बीच पनि कर्णालीका मतदाताले पुराना राजनीतिक शक्तिलाई पूर्ण रूपमा अस्वीकार नगरेको सन्देश दिएको विश्लेषकहरूको भनाइ छ।
प्रतिक्रिया
सम्बन्धित खवर
